Colectivo Cultural Buril

O Entroido na memoria

2012-02-15T23:53:00.003Z

Desde o colectivo cultural Buril temos o prazer de apresentar-vos O Entroido na memoria, documentário áudio-visual realizado polo Buril em 2001. Com esta re-ediçom em formato digital, queremos recuperar este documento com a vontade de fazê-lo chegar aos vizinhos e vizinhas de Burela e a todas as pessoas interessadas nesta temática. Para além do valor afectivo e sentimental que com certeza terá para muitos burelaos e burelás, O Entroido na memoria constitui um documento de grande interesse tanto para o estudo da história local como para a etnografia e a historiografia galegas.

O Entroido na memoria nom é só um retrato do entroido da Burela de finais do século XX, mas também umha viagem ao entroido do passado, contado de viva voz polos nossos velhos e velhas. Aquel entroido popular, espontáneo, esmorgueiro e retranqueiro. O “entrudo chocalheiro” -como cantou o Zeca-, o dos excessos, da burla, do escárnio e do mundo ao revés. Em definitiva, o entroido tradicional, que o Buril quijo recuperar nos anos 80 e 90 do passado século, para que umha das manifestaçons mais genuínas da cultura galega nom caisse no esquecimento nem se visse desvirtuada polas alienantes modas do momento.

O entroido aldeao de outrora, o das carautas e disfarces artesanais a percorrer casas e corredoiras, tomava agora, da mao do Buril, forma de gincana polas ruas e bares de Burela, na que se realizavam as provas mais bizarras e extravagantes que podamos imaginar. Também se recuperavam tradiçons locais como a de “correr a auga”, que em palavras de Ricardo Pena, primeiro cronista oficial da vila, é umha das tradiçons mais ancestrais que partilham os povos marinheiros. Ao berro de “auga aquí”, @s participantes alertavam da sua presença e faziam um chamamento popular à molheira colectiva, estabelecendo umha nova ordem social, na que nom havia privilégios de género, classe social, ou de calquera outro tipo.

Mas a tradiçom também se renovava, e apareciam as comparsas que adaptavam a mofa e a burla populares à crítica social e política mais azeda. Deste jeito, o desfile de comparsas, convertía-se num foro público no que ridiculizar os poderes político, económico ou religioso. O entroido finalizava com o enterro da sardinha, no que a “corporaçom municipal”, eleita por legítima votaçom popular, acompanhava o defunto polas ruas de Burela. A comitiva completavam-na o crego, os gaiteiros e um grande número de vizinhos e vizinhas que ao som do infatigável pranto das choroas, desfilavam a passo lento qual Santa Companha para darem a última despedida ao entroido.

Assim é pois o entroido que podemos ver neste documentário e no que o Buril tanto colaborou. As pessoas que hoje conformamos o colectivo, queremos fazer o nosso humilde contributo ao conhecimento da nossa história recente e à consolidaçom da nossa memória colectiva, lembrando aquelas mulheres e aqueles homens que hai quase 30 anos sairom à rua para berrar alto e forte: “Auga aquí!”

Fevereiro de 2012.

Junta Regedora do Colectivo Cultural BURIL

Apresentaçom pública do Entroido na memoria

2012-02-14T12:16:00.010Z

O xoves 16, quinta-feira, às 20:30 horas, terá lugar a apresentaçom pública do DVD O Entroido na memoria, vídeo-documentário realizado polo Colectivo Cultural Buril em 2001. O acto decorrerá na sala de conferências de Burela (antiga biblioteca) e nel projectara-se este documento audio-visual no que nom só veremos um retrato do entroido da Burela dos anos 80 e 90 do passado século, senom que também nos achegaremos ao entroido de pós-guerra contado em primeira pessoa polos seus protagonistas.

Com esta re-ediçom em formato digital, queremos recuperar este documento com a vontade de fazê-lo chegar aos vizinhos e vizinhas de Burela e a todas as pessoas interessadas nesta temática. Para além do valor afectivo e sentimental que com certeza terá para muitos burelaos e burelás, O Entroido na memoria constitui um documento de grande interesse tanto para o estudo da história local como para a etnografia e a historiografia galegas.

Desde o Buril, convidamos a todas as vizinhas e vizinhos a assistirem a este acto, especialmente a aquelas pessoas que participarom e participam activamente no entroido burelao.

Apresentaçom do Trasno no I.E.S. Monte Castelo

2012-02-06T13:13:00.007Z

O próximo mércores 8 de fevereiro, quarta-feira, o Colectivo Cultural Buril apresentará a revista O Trasno no I.E.S. Monte Castelo. Desde este colectivo queremos fazer chegar aos centros de ensino de Burela esta publicaçom que com periodicidade bimensal foi editada polo Buril entre os anos 1985 e 1990 e que o passado ano via a luz numha reediçom em dous volumes.

Na apresentaçom, que achegará às moças e moços dos centros de ensino este documento imprescindível para o conhecimento da história da nossa vila, estará presente um membro da actual Junta Regedora do Buril ademais de dous dos promotores do Trasno e membros da Junta Regedora do Buril na etapa na que a revista se editou: Emilio González Legaspi e Manuel Nebril.

Esta reediçom d'O Trasno, gratuita para os sócios e sócias do Buril, está à venda nas livrarias para aquelas pessoas que queiram adquiri-lo ademais de contarmos com vários exemplares na biblioteca pública municipal e nos centros de ensino de Burela. Aquelas pessoas que tenham interesse na revista podem consultar os cinco primeiros números (Nº0 a Nº4) em formato de fácil leitura na internet.

Acima disponibilizamos o vídeo da apresentaçom pública da re-ediçom revista, que tinha lugar em Abril do passado ano no auditório da Casa da Cultura de Burela.

Espectacular sucesso do III Aberto do Bonito

2011-09-23T18:07:00.008+01:00

Vem de celebrar-se, no passado fim de semana, o III de Aberto do bonito. O sábado tivo lugar o primeiro aberto da temporada regular da Liga Nacional de Bilharda e o domingo disputou-se um torneio de bolos das modalidades "pungeiro" e "jove". De manhá tivo lugar um torneio para crianças e já na tarde houvo um torneio para adult@s.

Deixamos algumhas imagens deste III Aberto do Bonito.

Já está aquí o III Aberto do Bonito!

2011-09-15T00:41:00.002+01:00

Esta fim-de-semana terá lugar no porto de Burela o III Aberto do Bonito, torneio no que as e os participantes loitaram um ano mais polo prezado bonito do norte.

O sábado 17 desenvolvera-se o Aberto de Bilharda a partir das 16h00 no porto de Burela. Neste aberto participarám varias equipas da comarca na que é a primeira prova puntuável da tempada 2011-2012 do campionato de bilharda, organizado pola Liga Nacional de Bilharda.

O domingo 18 celebrara-se o torneio de Bolos Tradicionais. De manhá, desde as 11h00, as e os mais pequenos da casa poderam conhecer de perto o jogo dos bolos tradicionais na pista desportiva do parque Rosalia de Castro. Já na tarde, a partir das 15h00, terá lugar o torneio no porto.

O aberto do Bonito forma parte do programa de actividades organizadas com motivo da Semana europeia da mobilidade que se celebra em Burela do 16 ao 22 de setembro.

As pessoas interessadas podem participar coa equipa do Buril ou bem com equipa própria. Para qualquer informaçom do Aberto podedes contactar com nós no email ccburil@gmail.com.
Para participar em qualquer das modalidades só é preciso estar no lugar do Aberto meia hora antes do começo dos jogos.

QUERES QUE CHO CONTE? de Palimoco Teatro

2011-08-17T19:10:00.007+01:00

O próximo domingo apresentamos-vos a nossa próxima actividade na que Palimoco Teatro porá em cena a obra Queres que cho conte?

A representaçom terá lugar en Burela o domingo 21 de agosto às 16:30 na praça da Marinha (em caso chover seria na casa da Cultura).

A obra Queres que cho conte? está baseada numha selecçom de contos populares compilados num CD, e que serám narrados e musicados ao vivo para os nenos e nenas. Representaram-se nove contos com versons recolhidas na geografia luguesa, que som herdança de geraçons de narradores e narradoras das aldeias e vilas de Lugo e revivirám neste conta-espectáculo no que se mistura música, contaconto, teatro e dança.

Esta actividade está integrada no projecto cultural Cultura sobre Rodas que promove a Área de Cultura e Turismo da Deputaçom Provincial de Lugo, e será desenvolvida pola companhia de teatro profissional Palimoco Teatro em colaboraçom com o Colectivo Cultural Buril.

José António Lestao, (1893-1974). Referente do ensino em Burela

2011-08-14T15:25:00.015+01:00

A seguir reproduzimos um interessante artigo de Bernardo Penabade sobre José António Lestao. O professor Penabade ofereceu umha palestra sobre esta importante figura da Burela do século XX nas Ias Jornadas de História Local de Burela, celebradas os passados dias 9, 10 e 11 de Agosto e organizadas polo colectivo cultural Buril.

JOSÉ ANTONIO LESTAO MANZANO (1893-1974), UM REFERENTE DO ENSINO EM BURELA

Durante a celebraçom das Ias. Jornadas de História de Burela organizadas polo Colectivo Cultural Buril tivem a responsabilidade de coordenar um colóquio com o que se pretendia descrever e valorar a ingente obra social promovida polo armador e filántropo José António Lestao Manzano (Morás, 1893-Burela, 1974). Sinto-me satisfeito de ter feito esta exposiçom em presença de parentes, amizades e vecindário -muitas das pessoas presentes no público tratárom-no e incluso se beneficiárom dos múltiplos logros das suas iniciativas-, porque uns e outros saímos satisfeitos da posta-em-comum com a que conhecemos melhor a figura que nos reunia.

Soubem da existência de José António Lestao como resultado dos trabalhos de documentaçom do “Modelo Burela”, concretamente seguindo as pistas do ensino da língua inglesa na localidade. Falaram-me dele com muito entusiasmo Glória do Corneta e Fina de Miranda, enfatizando a sua actuaçom humanitária como intérprete com as famílias das vítimas da II Guerra Mundial recolhidas polos pesqueiros locais nas proximidades da Estaca de Bares. Glória e Fina recomendaram-me acudir a Témis e Santiago (filha e genro de José António) para que me falassem dele e me permitissem conhecer em primeiro plano os documentos do seu legado. Assim foi feito, em boa hora.

Justo na medida em que observava a correspondência com o mestre Camilo Fernández ou que tinha nas minhas maos os livros e revistas com os que estudou e ensinou a língua inglesa, foi medrando em mim um sentimento de admiraçom por umha pessoa feita-a-si-mesma, que superou com brilhantez os obstáculos que se lhe apresentárom ao longo dos seus 81 anos de vida.

Integrante dumha família numerosa -foi o sétimo de oito irmaos-, sendo neno aprendeu as quatro regras com a ajuda do cabo Constantino do Campo e com 17 anos emigrou aos Estados Unidos, onde conseguiu emprego nas infra-estruturas rodoviárias da Califórnia. Na cidade de San Francisco estudou de jeito autodidacta o inglês, ao tempo que conheceu as teorias evolucionistas de Darwin e que se interessou por diversas artes, entre elas a fotografia e o cinema.

Já retornado (1926), obtivo a titulaçom de patrom de pesca e, junto com Eduardo Lestao (irmao), foi armador da "Manolita" e integrou-se no sector pesqueiro, em benefício do qual tentou aplicar os conhecimentos em matéria de infra-estruturas que adquirira em América. Durante a IIª República foi presidente do pósito local e impulsionou as obras do primeiro porto de Burela.

No segundo período de gestom, neste caso à cabeça da directiva da Confraria (1953-1957), gestionou a construçom das vivendas de protecçom oficial (as "Casas Baratas"), contribuiu decisivamente para a criaçom da Escola de Orientaçom Marítima (na qual tivo um papel tam destacado o seu colaborador Benigno Beltrán), defendeu a compra da Fábrica de Bravo (que salvou vários postos de trabalho do sector conserveiro) e capitaneou o projecto de edificaçom dumha nova lonja, justo onde estám hoje o original "parlamento e sede do governo" dos marinheiros reformados. Impressionante currículo, aqui resumido.

Transcorridos quase quatro decénios desde a morte, a José Antonio Lestao chegou-lhe a hora deste modesto reconhecimento público. Poucos haverá que o tenham mais merecido.

Bernardo Penabade Rei

Bernardo Penabade, acompanhado, de esquerda a direita por Piedad, sobrinha do "mestre D. Camilo", Glória do Corneta e Témis Lestao, filha de J. António Lestao.

JOSÉ ANTONIO LESTAO MANZANO. (Morás, 1893- Burela, 1974)

Referente do ensino em Burela. Precursor do Modelo Burela

PERFIL BIOGRÁFICO

1.- Família numerosa de Morás: foi o 7º de 8 irmaos.

2.- Infáncia e adolescência em Burela. Assistente à escola de Constantino do Campo (1900-1910).

3.- Emigraçom aos Estados Unidos (1910)

4.- Visita de reencontro familiar ao Uruguai (1913)

5.- Emprego no sector petrolífero (1913-1922)

6.- Emprego nas infraestruturas ferroviárias (1922-1926)

7.- Retorno a Burela. Armador da "Manolita"

8.- Presidência do Pósito (1931-1933): a construçom do porto

9.- Construçom da casa na rúa das Flores (193?-1937)

10.- Labor humanitário durante a IIª Guerra Mundial (1945-47)

11.- Presidência da Confraria (1953-1957)

- Reivindicaçom das Casas Baratas

- Criaçom da Escola de Orientaçom Marítima

- Compra da Fábrica das Conservas Bravo

- Edificaçom da lonja nova (actual Cruz Vermelha)

12.- Retiro laboral (1959) e falecimento (1974)

I Jornadas de História Local. Burela, 9, 10 e 11 de Agosto de 2011

2011-08-03T14:38:00.038+01:00

O Colectivo Cultural Buril organiza as I Jornadas de História Local de Burela, que se desenvolverám entre o 9 e 11 de Agosto. As actividades que se levarám a cabo serám fundamentalmente palestras divulgativas sobre distintas temáticas, e terám lugar todas elas às 20h30 na Sala de Conferências (Antiga Biblioteca), ainda que também realizaremos um roteiro pola Vila do Médio e Vilar o dia 11, com saída às 16h30 da igreja da Vila do Médio.

Estas jornadas que botam a andar pola primeira vez em Burela neste ano 2011, pretendem recuperar e pôr em valor etapas, feitos e pessoas destacadas da história da nossa vila, para assim poder comprendermos as peças chave que contribuirom à configuraçom do nosso devir através dos anos. Entendemos que nom hai povos sem história, mas para que os acontecimentos que nos precederom podam ser conhecidos, estudados e analisados devemos recolhe-los, compila-los e escreve-los. É por isso que o Buril quer contribuir na medida das suas modestas possibilidades a ampliar os estudos de carácter histórico que outros e outras já figerom sobre Burela.

As jornadas nom estám dirigidas exclusivamente a estudiosos e estudiosas especializadas, por isso atendem a um enfoque principalmente didáctico para que sejam acessíveis ao público em geral e a todos os vizinhos e vizinhas de Burela, pois eles e elas som sujeitos activos no próprio processo de desenvolvimento histórico.

O martes/terça-feira, dia 9, darám começo as jornadas com umha palestra sobre umha das estapas mais cruciais na história da Galiza. Xoán Ramón Fernández Pacios falará sobre a Burela da Idade Média, centrando-se na figura de D. Pedro de Bolanho, personagem fundamental no litígio pós-Pardo de Cela com os Reis Católicos.

O mércores/quarta-feira, dia 10, poderemos achegar-nos a umha pessoa de vital importáncia no desenvolvimento económico e educativo na Burela do século XX. Bernardo Penabade Rei, achegara-nos a José Antonio Lestao (1893-1974), presidente do Pósito de Pescadores de Burela durante vários anos e homem de profunda vocaçom humanista que desenvolveu um papel importante no campo educativo em Burela.

O xoves/quinta-feira, dia 11, concluem as jornadas com umha visita à Vila do Médio e Vilar, para dar a conhecer a abundáncia de nomes de lugar que existem nestes dous espaços da Burela histórica. No roteiro farám de guias os vizinhos e vizinhas mais maiores destes lugares, pois eles e elas som os que melhor conservam este aspecto tam importante do nosso património. As pessoas interessadas em participar, poderám achegar-se às 16h30 à igreja da Vila do Médio, lugar no que dará começo o roteiro. A seguir a esta visita, Xosé Lois Vilar Pedreira dará umha palestra sobre o trabalho de campo desenvolvido na costa sul da Galiza que deu como resultado o livro Talasonimia da costa sur de Galicia. Vilar comentará os aspectos fundamentais neste tipo de trabalhos sobre a micro-toponímia e ilustrara-nos com exemplos concretos que poderám servir de modelo para futuros trabalhos deste tipo em Burela.

O Trasno. 1985-1990

2011-04-25T12:20:00.040+01:00

O Colectivo Cultural Buril vem de tirar do prelo a ediçom fac-símile da revista O Trasno, que será apresentada publicamente o próximo sábado 30 de abril, às 20:00 horas no auditório da casa da cultura de Burela. No acto, que será apresentado por Senín Díaz Mon (membro do Buril e técnico em Rádio Burela) intervirám:

Emilio Legaspi, foi membro activo do Grupo de Trabalho d'O Trasno
Javier Rivera, foi delegado do jornal El Progreso na Marinha e colaborau n'O Trasno
Rosana Valle, presidenta do C.C. Buril

Também participarám a Coral Polifónica de Burela e a Banda de Música de Burela, que interpretarám peças do repertório galego e estrearám a peça Requiem?, composta especialmente por Hernán Naval para o último número d'O Trasno. Esta peça de Naval, que será interpretada pola primeira vez, quer ser também umha pequena homenagem do Buril ao músico e activista cultural, no que é o décimo aniversário da sua morte.

O Trasno foi umha publicaçom do Buril de ámbito local e comarcal que com periodicidade bimensal saiu à rua entre Novembro de 1985 e Maio de 1990. Esta revista foi possível graças a um importante grupo de pessoas, que dentro do Buril constituirom um Grupo de Trabalho para a sua elaboraçom e que desenvolverom todas as partes do trabalho precisas para que fosse umha realidade: redigir, maquetar, financiar, distribuir... Nas suas páginas podemos encontrar informaçom sobre a actualidade cultural, política e socio-económica do momento em Burela e outros lugares do Concelho de Cervo e da Marinha. Também tenhem especial importáncia os temas relacionados com a língua, a história, o meio ambiente e território... O Trasno, em definitiva, constitue um documento imprescindível para o conhecimento da nossa história recente.

Esta ediçom fac-símile d'O Trasno sairá em formato livro, em dous tomos com caixa. Será gratuito para os sócios e sócias do Buril e estará à venda nas livrarias para aquelas pessoas que queiram adquiri-lo. Serám entregues vários exemplares na biblioteca pública municipal e nos centros de ensino de Burela.

Para já, aquelas pessoas que tenham interesse na revista podem consultar os cinco primeiros números (Nº0 a Nº4) em formato de fácil leitura na internet.

Open publication - Free publishing - More a marinha

O Buril no Maratom de Leitura de Burela

2011-02-22T11:18:00.007Z

O Buril participará no Maratom de Leitura que terá lugar este 22 de Fevereiro em Burela, onde se dará leitura continuada a distintos trechos de obras da literatura galega desde as 9:00 até as 21:00 horas. O nosso colectivo soma-se assim a outras associaçons da vila que concluirám esta jornada de leitura a partir das 20:00 horas.

O texto escolhido polo Buril é um relato de Séchu Sende, do seu livro Made in Galiza, que leva por título Falar. O livro, publicado em 2007, recebeu o prémio Anxel Casal ao Melhor Livro do Ano, concedido pola Associaçom de Editores Galegos. No 2010 foi distinguido como a melhor publicaçom em curdo.

Séchu Sende é autor de outras obras, como Odiseas, acessível para a sua leitura em formato digital, Orixe, com a que ganha o Blanco Amor em 2003 e recentemente vem de publicar um livro ilustrado titulado Animais.

Desde o C.C. Buril queremos agradecer a colaboraçom de Séchu Sende, que acedeu com muito gosto a que déssemos leitura a umha pequena parte da sua obra neste Maratom Literário de Burela.

Petiscos

2010-12-04T13:26:00.004Z

Lembrai que hoje, às 21h00, haverá uns petiscos na (re)-inauguraçom do nosso local social, na antiga praça de abastos (primeiro andar). Todas as pessoas associadas estais convidadas e aquelas que sem estarem associadas tiverem interesse em assistir a esta jornada de lazer podem contactar connosco no correio ccburil@gmail.com

A partir das 17h00 estaremos ali para limpar e arrumar o local (também estais convidad@s).

Até a noite!

II Aberto do Bonito

2010-09-13T17:28:00.020+01:00

O próximo fim-de-semana terá lugar em Burela a segunda ediçom do aguardado Aberto do Bonito, na pista desportiva do parque Rosalia de Castro.

O sábado 18, disputara-se o Aberto de Bilharda, no que participarám distintas equipas da Marinha, sendo esta a primeira prova pontuável do campeonato que organiza a Liga Nacional de Bilharda. Já no domingo, dia 19, estará em jogo o Aberto de Bolos Celtas, no que colabora mui activamente entre outras a equipa do Clube de Bolos de Jove.

Ambos os abertos jogaram-se a partir das 16:00 horas e neles as equipas participantes competirám polo grande bonito do norte, peixe com o que serám obsequiad@s os ganhadores ou ganhadoras de ambas as modalidades desportivas. Também se fará entrega de um prato comemorativo do II Aberto do Bonito a aqueles e aquelas que fiquem entre os três primeiros postos da classificaçom.

Todas as pessoas que queiram podem participar nos abertos de bilharda e bolos celtas com a equipa do Buril ou com umha equipa própria. As pessoas interessadas podem pôr-se em contacto connosco no endereço electrónico ccburil@gmail.com ou no telefone 616473366.

A zona geológica do Perdouro

2010-09-05T20:10:00.006+01:00

O próximo 10 e 11 de setembro o Buril organiza umhas Jornadas didácticas sobre a zona geológica do Perdouro.

A sexta-feira (venres), às 20h00 terá lugar no Salom de Conferências de Burela umha apresentaçom didáctica sobre a zona geológica do Perdouro, a cargo de Águeda Barcia Iravedra, professora de biologia e geologia no I.E.S. Monte Castelo de Burela e especialista nesta zona de grande interesse geológico.

O sábado, faremos umha visita guiada, também coa professora Águeda Barcia, com saída de Castrelo às 11h00.

Todas as pessoas interessadas podem participar destas actividades pensadas para dar a conhecer o nosso meio natural.

O movimento associativo marinhao homenageia Rosalia de Castro

2010-07-14T16:02:00.019+01:00

O movimento associativo marinhao homenageia Rosalia de Castro no 125 aniversário da sua morte

Ontem, às 20h00, tivo lugar em Burela um acto de homenagem a Rosalia de Castro no parque que leva o seu nome, organizado polas associaçons marinhás Francisco Lanza de Riba d’Eu, Ollomao de Barreios, Pomba do Arco de Foz, Buril de Burela, Arrincadeira de Rio Torto, O Millerio de Ourol, Irmandade San Caetano de Celeiro de Marinhaos, Mardouro do Valadouro, Anduriña de San Cibrao, Mariña Patrimonio e o Observatorio da Mariña pola Igualdade.

Este acto foi organizado para comemorar o 125 aniversário da morte da escritora de Padrom ao tempo que para reivindicar a reabertura e carácter laico do Pateom de Galegas e Galegos Ilustres de Sam Domingos de Bonaval, onde se encontram os restos mortais de Rosalia e Castelao entre outros. Neste sentido, os organizadores mostrarom-se satisfeitos, logo de conhecerem a notícia da reabertura do Panteom, trás assinarem o Governo galego e o arcebispado de Compostela um convénio para o seu uso no mesmo dia de ontem, ainda que manifestarom que continuaram a reclamar o carácter laico do Panteom.

O movimento associativo marinaho de base, quijo com este acto dignificar, divulgar e pôr em valor a obra da escritora, e contarom para o evento com a presença da música da Banda de gaitas Dambara de Burela, assim como com três pessoas convidadas que pugerom voz a distintos textos de Rosalia.

De esquerda a direita: Ceslso Dourado, Miguel Sande e Olga Castro.

Eles forom o escritor e jornalista Miguel Sande, quem partilhou com Novoneyra a directiva da AELG (Asociación de Escritores en Língua Galega) a finais dos 80 e primeiros 90. Tem libros publicados de poesia, romance e teatro, género este último no que tem recebido vários prémios, como o Rafael Diste. Sande mostrou a sua surpresa por termos que assistir, em pleno século XXI a actos como este para reivindicar a figura de Rosalia e a reabertura do espaço em que se encontram os seus restos.

Também assistiu a tradutora e jornalista Olga Castro, quem colabora com distintas universidades e meios de comunicaçom e desenvolve estudos de investigaçom em temáticas como ideologia na traduçom, linguagem nom sexista e traduçom e teorias feministas entre outras. Alias, forma parte do Obervatorio da Mariña pola Igualdade. Castro, quijo reivindicar a Rosalia mais comprometida com os problemas sociais e de género e deu leitura a distintos textos em prosa da autora.

O artista barreirense Celso Dourado foi o último em pôr voz aos poemas de Rosalia. Dourado é um reconhecido artista marinhao, que para além das suas qualidades criativas visíbeis na sua magna obra Eido Dourado, tem-se destacado no seu compromiso social com os problemas que afectam à Marinha. Dourado quijo concluir com um poema do livro Cantares Gallegos, do que formam parte estes conhecidos versos da autora:

Probe Galicia, non debes

chamarte nunca española

Qu’España de ti s’olvida

cando eres ¡ai! tan hermosa.

A agrupaçom musical burelá Dambara fechou a leitura dos textos de Rosalia com a interpretaçom dumha peça tradicional. Os organizadores concluírom o acto agradecendo a presença a todos e todas as assistentes e convidando-os a participarem no Acto cívico e reivindicativo organizado pola Asociación de Escritores en Língua Galega que terá lugar o próximo xoves, 15 de xullo, em lembrança do traslado dos restos mortais de Rosalia de Castro de Padrom a Compostela.

Já no fim do acto, os músicos de Dambara interpretarom o Hino Galego, que foi entoado polas pessoas assistentes.

Dia das Letras 2010

2010-05-14T00:09:00.009+01:00

Já pintamos o nosso mural com motivo do Dia das Letras deste ano 2010, com a legenda "Na Galiza, 365 dias em galego", situado num dos muros exteriores do pavilhom Vista Alegre de Burela, em clara alusom à farsa que representa um dia no que se pretende dar umha imagem de normalidade para o nosso idioma, quando a realidade nos dize que perdemos milheiros de falantes por ano e que ainda nom podemos utilizar a língua com normalidade em todos os ámbitos da nossa vida diária. Porque nom nos chega um dia com as capas dos jornais em galego, porque nom queremos que o 17 de Maio fique numha simples homeganem institucional a umha figura destacada das nossas letras, pedimos viver na Galiza, 365 dias em galego.

Esta sexta-feira projectaremos o filme galego Pradolongo, do realizador Ignacio Vilar, cita que terá lugar às 20:00 horas na sala de usos múltiplos da Casa da Juventude de Burela.

O Buril também estará presente na manifestaçom convocada para o 17 de Maio, com saída às 11h30 da Alameda compostelana.

Redeiras

2010-03-15T19:05:00.003Z

O Colectivo Cultural Buril organiza para o próximo sábado 20 de março às 17h30 no salom de conferências de Burela, a projecçom do documentário Redeiras e, posteriormente, umha mesa redonda na que intervirám Mª Jesús Alonso López (presidenta da Asociaçom de redeiras “Cabo Burela”), Ángeles Millé Rodríguez e Rosa Rodríguez Vidal (secretária e presidenta da Federaçom Galega de Redeiras artesás).

As redeiras som um colectivo de trabalhadoras que, dia a dia, trabalham nos portos galegos elaborando e reparando malhas e aparelhos pesqueiros. A maior parte som mulheres que, como moitas outras, começam a sua jornada de trabalho de manhá cedo e rematam na última hora da tarde. Mas é necessário salientar que é o que fai que o seu trabalho seja mui diferente do de outras galegas. O facto de serem mulheres fijo que, durante muitos anos, o seu trabalho fosse pouco menos que “invisível” para as administraçons com a perda de direitos que isso acarreta, ou que socialmente fosse considerado como umha “ajuda” do salário que se necessitava na casa.

Os dados oficiais falam de umhas 700 mulheres que se dedicam a este trabalho na Galiza, mas estima-se que o número pode case duplicar-se tendo em conta as que trabalham de jeito ilegal. Aqui é onde radica um dos importantes problemas deste colectivo, o intrusismo laboral, que fai que em muitos portos como o de Burela, Malpica, Laxe, A Guarda... o trabalho nom regulamentado e a economia submergida gerem umha competência desleal que provoca que as redeiras tenham uns salários muito menores e umha deficiente situaçom laboral.

Outro ponto importante que se há-de considerar é o referido à formaçom, pois este ofício requer de muitos anos de aprendizagem polo que umha das principais exigências destas trabalhadoras é que se impulsione a formaçom profissional e a melhora das condiçons, de jeito que o relevo geracional seja mais doado do que é a dia de hoje.

Além disto, outra das problemáticas importantes é que nom se lhes reconhecem as doenças que som derivadas da sua profissom (como por exemplo as dores cervicais ou as hérnias discais), o que vém sendo outra das luitas diárias destas mulheres.

A Federaçom Galega de Redeiras nasceu no ano 2004 e integra a 12 associaçons de toda a Galiza, entra as que está a associaçom de redeiras “Cabo Burela”. A partir de entom, estas mulheres caminham juntas para atingir a dignificaçom da sua profissom e sair da invisibilidade na que se encontram desde há décadas, luitando contra o intrusismo profissional e a competência desleal, reivindicando a melhora das condiçons laborais, promovendo a formaçom e assim ajudar a garantir o relevo geracional desta profissom que é fundamental na Galiza e da que muitas e muitos de nós somos desconhecedores.

Desde o Colectivo Cultural Buril, convidamos a todas as pessoas interessadas em conhecer de perto o trabalho deste colectivo de mulheres, tradiçom ancestral da nossa vila e do resto do país, a que assistam este sábado à projecçom do documentário e participem da mesa redonda na que as redeiras nos achegarám o seu dia-a-dia e os esforços que realizam, e ficam por realizar, por dignificar o seu trabalho.

Mais de cem pessoas assistem ao debate sobre política municipal

2010-01-05T00:54:00.010Z

Grande assistência de público ao debate sobre política municipal organizado polo C.C. Buril nesta segunda-feira, 4 de Janeiro. As pessoas que acudirom a esta mesa redonda, na que participavam os porta-vozes dos três partidos políticos com representaçom na Câmara Municipal de Burela, encherom as cadeiras do Salom de Conferências, polo que umha parte do público tivo que presenciar o debate de pé. Segundo os nossos cálculos juntarom-se por volta de 120 pessoas, o que nos fai pensar que a gente de Burela tem interesse pola vida política municipal e polas análises, valoraçons e propostas que podam fazer os políticos com representaçom no Concelho.

Desde o Buril queremos agradecer a presença de todas as pessoas assistentes, assim como aos porta-vozes do PP, BNG e PSOE em Burela, José María Barcia, Neves Cando e Alfredo Llano respectivamente. O nosso agradecimento também para Alicia Carballedo, delegada do jornal El Progreso na Marinha, que se encarregou de moderar este debate.

A política municipal burelá a debate

2010-01-03T13:20:00.007Z

O C.C. Buril organiza un debate sobre política municipal para a próxima segunda-feira, 4 de Janeiro, às 20h30. No acto, que terá lugar no Salom de Conferências de Burela, interviram os porta-vozes dos três partidos políticos com representaçom na Câmara Municipal de Burela.

Intervirá José María Barcia polo PP, Neves Cando polo BNG e Alfredo Llano polo PSdG-PSOE. Moderará o debate Alicia Carballedo, delegada do jornal El Progreso na Marinha.

Os porta-vozes falaram do labor dos seus respectivos partidos no Concelho, assim como do trabalho desenvolvido pola Junta da Galiza em Burela.

Feliziano 2010

2009-12-27T20:51:00.011Z

Queres celebrar a passagem de ano pola nossa hora? Vem à festa de fim de ano que Organiza o Colectivo Cultural Buril, a noite do dia 31, por volta das 23h45 (00h45 hora espanhola), no pub Penta de Burela. Seram retransmitidas as badaladas ao vivo desde um lugar surpresa. A seguir haverá música em galego e festa rachada até que os corpos aguantem.

E tu, vas ficar em casa? Vem celebrar o Fim de Ano pola hora galega connosco!

O Buril deséja-vos um feliz ano 2010!

Comunicado da ORA-NH

2009-12-25T16:08:00.014Z

O C.C. Buril tivo acceso a um vídeo da ORA-NH (Organizaçom Revolucionária Armada pola Nossa Hora) no que se pode ver a tres membros do Comando Burela, lendo o último comunicado que fijo público a organizaçom armada.
Também pode ver-se o momento prévio à leitura do comunicado, na que os guerrilheiros, com uns copos de licor café na mesa, conversam sobre distintos aspectos referentes à organizaçom. Deducimos da conversa, que a ORA-NH está a impôr o uso do galego reintegrado à sua militância e que a organizaçom pode estar num processo de debate interno para definir qual a estratégia política a seguir para os vindouros anos. Será a luita armada ou será a esmorga?

A ORA-NH anuncia a volta à luita armada

2009-12-24T12:21:00.013Z

Num comunicado que acaba de chegar à redacçom do Buril, a ORA-NH (Organizaçom Revolucionária Armada pola Nossa Hora) anuncia a volta às armas para a consecuçom do que dizem os seus "objectivos últimos". Deste jeito, a organizaçom armada, rompe com o cessar-fogo que declaravam por estas datas há um ano, ao entenderem que a estratégia esmorgueira com a que procuravam a implantaçom em Burela da hora natural galega (UTC=0) nom deu os resultados aguardados.

A seguir, reproduzimos na íntegra o cumunicado da ORA-NH:

A ORA-NH, após o cessar-fogo permanente declarado em Dezembro de 2009, quer informar ao conjunto da populaçom burelá da sua determinaçom de voltar às armas para a consecuçom dos objectivos últimos que persegue a nossa organizaçom: a reincorparaçom de Burela ao seu fuso horário natural, o GMT=0.

Porém, devemos de admitir que se nom temos feito já algumha acçom é devido à ausência de objectivos que se adaptem ao perfil estabelecido polo nosso Comité Central. A nossa intençom é a de agir contra as grandes infra-estruturas feitas nos últimos anos na nossa vila. Arrependemo-nos de ter confiado nos programas eleitorais dos partidos governantes. O PP na Junta, o PSOE em Madrí, e o bigoverno em Burela. Nengum levou a cabo um projecto digno dos nossos objectivos. Ainda mais, o PP com a sua tentativa de esvaziar o Hospital da Costa até a sua desapariçom pom ainda mais difícil o nosso labor.

Seja como for, a comprometida militância da ORA-NH continuará aguardando a apariçom em Burela dalgumha obra digna dos nossos ataques. Seguiremos à procura dalgum grande homem como o Patriarca Dom Leopoldo Eijo Garay que se preocupe realmente pola nossa vila.

Em definitiva, a ORA-NH volta às ruas para continuar com a sua luita na defesa dos interesses do povo burelao.

As uvas à nossa hora!

Burela ceive, poder copular!

Avante já a ORA-NH!

Aberto do bonito

2009-09-14T14:20:00.011+01:00

O próximo domingo, 20 de setembro terá lugar o I 'Aberto do bonito' na pista desportiva do parque Rosalia de Castro. Teremos dous encontros de duas das nossas prácticas desportivas tradicionais que parecia que iam ficar para a história dos jogos populares, mas que ano após ano voltam com mais força e com vontade de ficar para sempre e ajudar-nos a escrever a nossa história futura: estamos a falar dos bolos celtas e da bilharda.

Queremos que @s noss@s velh@s, que lembram jogar e ver jogar a estes jogos em Burela quando meninh@s, voltem viver mais umha jornada de autêntico furor pataqueiro. Para isso contaremos com a colaboraçom inestimável d@s amig@s boleir@s de Jove e do pessoal bilhardeiro da Liga Nacional de Bilharda, organizadores da Superliga 09-10 que começava o passado fim-de-semana superando todas as epectativas previstas.

Às 16h00 (15h00 hora galega) terá lugar o Aberto de bilharda e a seguir, por volta das 18h00 (17h00 hora galega) vibraremos com o Aberto de bolos celtas. Arranchade os vossos bolos, arranchade as vossas varas, porque @ ganhador/a levará o nosso mais prezado trofeu, sim, estamos a falar do autêntico bonito do norte! só apto de ser pescado polos marinheiros mais fortes, nessas 'mareas' onde os galegos vamos da mao dos irmaos crioulo-lusófonos de Cabo Verde, para dar caça ao grande túnido do norte coas nossas varas (vai ser que somos um país experto em varas).

Adiantamos que estamos prontos a fechar negociaçons para o grande encontro do ano do bilhardismo intercontinental: o Cabo Verde-Galiza. Estamos à espera de que a Federaçom cabo-verdiana autorice a sua equipa para o esperado jogo.

O nosso grande berro de guerra será: Avante a crioulo-lusofonia!

Para já, entoamos o hino nacional cabo-verdiano, o grande Cântico da Liberdade!

Canta, irmão
Canta, meu irmão
Que a liberdade é hino
E o homem a certeza.

Aclaraçons em relaçom a Arcadio Pardiñas

2009-09-02T00:31:00.000+01:00

Desde o Colectivo Cultural Buril observamos con grande sorpresa, como nas últimas semanas se veñen sucedendo manifestacións públicas en relación á posíbel mudanza do nome da Avenida Arcadio Pardiñas. En todas estas se alude de forma velada á nosa asociación.

Pensábamos que coa publicación do noso último artigo (09-08-09), ficara suficientemente claro cal era a proposta da nosa asociación con respecto á rúa Eijo Garay e á aplicación da Lei de Memoria Histórica na nosa vila, mais os últimos artigos e cartas ao director aparecidos na prensa indícannos todo o contrario, de aí a nosa sorpresa e indignación. Queremos pensar que estas manifestacións públicas son froito do descoñecemento da nosa proposta e non unha tentativa de desestabilizar o noso traballo asociativo.

É por este motivo que nos vemos na obriga de desmentir as opinións que aluden ao noso colectivo e aclarar algunhas cuestións, que aínda que xa foron explicadas no seu momento, non poden continuar a xerar ideas enganosas.

O Buril non pode tolerar que se lle critique a proposta de retirar o nome dunha rúa a Arcadio Pardiñas porque o Buril nunca, e dicimos outra vez, nunca, fixo esa proposta. O noso colectivo só propuxo a retirada do nome de Eijo Gary do noso rueiro, pola súa implicación directa no golpe de estado do 36 e se nalgún momento falamos de Arcadio Pardiñas, foi como resposta a un artigo de opinión onde se cuestionaba a nosa suposta falta de responsabilidade polas consecuencias que podería ter a mudanza de nome á rúa Eijo Garay. No artigo en cuestión, preguntábase se íamos ser consecuentes coa nosa proposta e se éramos conscientes de que a principal rúa da nosa vila levaba o nome dun “alcalde franquista” (sic). En ningún momento o Buril falou de “alcalde franquista” e si de alcalde que desempeñou as súas funcións no tardo-franquismo, sendo conscientes da importancia dos matices na linguaxe empregada. Tamén comentamos que a priori non se podía establecer comparación algunha entre unha personaxe con implicacións directas no golpe de estado do 36 que causou milleiros de mortes no noso país e un “alcalde dun pequeno concello da Mariña no tardo-franquismo”. A este respecto temos que agradecer o artigo de opinión no que se citaba textualmente o artigo 15, parágrafo primeiro da Lei de Memoria Histórica, segundo o cal, as administracións públicas deberían retirar as placas, a simboloxía e outros obxectos relacionados coa “sublevación militar, a Guerra Civil e a represión da Ditadura”, pois este apartado do texto legal ven darnos a razón.

Non hai dúbida ningunha de que a Lei obrigaría a retirar todos os honores a Eijo Garay na nosa vila, (tal como ten acontecido en Vigo, cidade natal do bispo), e tampouco hai dúbida algunha de que a rúa Arcadio Pardiñas non se vería afectada pola citada L ei. Na nosa proposta orixinal, non se falou en ningún momento de Arcadio Pardiñas, e os motivos polos que o Buril mencionou o seu nome noutras ocasións, pensamos que fican suficientemente aclarados.

Por iso, rogamos encarecidamente ás distintas persoas que nos últimos días están a criticar, a través dos seus escritos, propostas que o noso colectivo nunca fixo, que lean de novo (se é que xa o fixeron) o noso último artigo, publicado o día 9 de agosto nas edicións dixitais e en papel da prensa da Mariña. Unha vez feito isto, non ocultamos que agradeceríamos unhas desculpas públicas por parte daquelas persoas que dalgunha forma danaron a imaxe do noso colectivo. Entendemos que alén de ser un xesto de humildade que diría moito ao favor de alguén o saber recoñecer os seus erros, tamén sería un acto de xustiza para co noso colectivo, que nos últimos tempos sufriu inmerecidas críticas por algo que nunca propuxemos.

O Buril tamén quere manifestar o seu desexo de que nun futuro non se produzan mais malentendidos como os acontecidos e que cando se cuestione o noso traballo se faga desde unha análise seria e responsábel das nosas propostas. Estamos abertos ao debate e cremos que ese é o motor que debe mover o traballo asociativo en Burela, sempre que se faga desde unha perspectiva crítica e razoada, e por iso propuxemos a creación dunha comisión encargada de estudar a simboloxía susceptible de verse afectada pola Lei.

Concluímos dicindo que non procuramos o eloxio nin o aloumiño para o noso colectivo, mais si que pedimos un trato respectuoso e que se teña en conta que ao longo do ano tamén realizamos distintos tipos de actividades e non só propostas para mudar nomes de rúas: Festa de Fin de ano (coa realización dun audiovisual para a ocasión); presentación do libro De Roncesvales a Compostela; debate sobre a reforma da Lei do aborto; actividades das Letras Galegas; I Encontro literario de Burela con veciñas e veciños da vila… e tentaremos realizar mais actividades antes de que finalice o ano. Non deixa de chamarnos a atención que ningunha das persoas que cuestiona o noso traballo, non denunciase publicamente as agresións que sufriron os murais que realizamos para conmemorar o día das Letras Galegas de 2008 e 2009. Tampouco nos parece xusto que se nos esixa a demanda de mais prazas nas escolas infantís ou unha ensinanza e unha sanidade de calidade. Entendemos que esas cuestións escapan ás nosas posibilidades de traballo como colectivo local por teren unha dimensión estrutural, sendo competencia de iniciativas asociativas integradas nunha estrutura nacional.

Colectivo Cultural Buril.

Posicionamento do Buril após a rolda de encontros cos partidos políticos de Burela sobre a rúa Eijo Garay

2009-09-02T00:24:00.002+01:00

Fai hoxe un mes, o Buril facía pública a súa proposta para retirar o nome do bispo fascista Eijo Garay a unha das principais rúas da nosa vila, tendo en conta a súa implicación directa no golpe de estado do 36 e na posterior represión e consolidación do réxime franquista, proposta feita ao amparo da Lei da Memoria Histórica en vigor, cuxa aplicación xa nos tiña dado a razón hai só uns meses coa retirada do nome de Eijo Garay ao actual colexio vigués “Illas Cíes”, cidade de nacemento do “Patriarca”.

A nosa intención era acadar o apoio dos tres grupos políticos con representación no Concello de Burela para que a nosa proposta fose aprobada en pleno municipal, mais despois de entrevistármonos coas tres forzas políticas vimos que non había unha postura de consenso. Desde o Buril temos que agradecer o trato sempre cordial que nos deron por parte dos tres partidos e o respecto con que foi acollida a nosa proposta, aínda que non podemos ocultar unha certa sorpresa pola falta de apoio inmediato a unha iniciativa para a que críamos (e continuamos a crer) que non hai debate. Ou hai alguén que entenda que un señor que apoiou un golpe de estado contra un goberno lexitimamente elixido en febreiro de 1936, poda ter unha rúa dedicada á súa figura na nosa vila? Mais aínda cando sabemos, polo 1º Informe das Vítimas da represión en Galicia (1936-1939) -estudo de recentísima publicación, froito dun proxecto de colaboración entre as tres universidades galegas- que morreron neses anos na Galiza 4.560 persoas de forma extraxudicial e 1.091 persoas por xuízo sumarísimo. Diante destes tristes datos, o Buril non pode mais que continuar cara adiante coa súa iniciativa, aínda que entendemos que haxa que facer unha reformulación da proposta inicial pola falta de consenso por parte dos partidos políticos da vila.

Despois dunha rolda de reunións encontrámonos coa seguinte situación: o Partido Popular mostrouse en contra de retirar unha rúa ao bispo, aludindo á súa “axuda” para a construción do porto de abrigo, estando tamén en contra da aplicación dunha lei que eles rexeitan, posición coa que non concordamos, como ben se pode deducir do noso último artigo publicado ao respecto; Foi outro o sentir do PSOE e BNG, entendendo estes que a lei ten que ser aplicada, mais desde un prantexamento xeral, no que sexa unha Comisión integrada por representantes dos partidos políticos e das asociacións veciñais e culturais de Burela, a encargada de estudar non só o caso da rúa Eijo Garay, senón os de todas as rúas e símbolos da vila que se podan ver afectados pola citada Lei da Memoria histórica.

O Buril, tendo en conta o dito até aquí, vai manter firme a súa intención de eliminar o nome de Eijo Garay dunha das principais rúas da nosa vila, así como de todos os nomes e símbolos relacionados co franquismo, polo que vamos apoiar a creación desa comisión, por coherencia e por entender que é unha iniciativa dos dous partidos políticos que a día de hoxe forman maioría de goberno en Burela, e polo tanto representan á maioría social da nosa vila. Non podía ser doutro xeito, pois a proposta do Buril non se podía cinguir exclusivamente ao caso da rúa Eijo Garay, deixando fóra outras rúas e/ou símbolos, como se pode reparar se ollamos o título do dossier no que presentábamos a nosa proposta orixinal: Por hixiene democrática: Eliminación da simboloxía fascista da nosa vila!. É por iso que tamén temos que manifestar o noso malestar por aquelas opinións aparecidas en distintos medios de comunicación nas que se dubidaba da nosa falta de rigor ou de actuar de forma pouco consecuente, cuestionando qué faríamos desde o Buril coa Avenida Arcadio Pardiñas, se chegado o momento se lle tivese retirado unha rúa a Eijo Garay.

Sen entrar agora en polémicas estériles que pouco ou nada poden aportar á consecución dunha Burela limpa de “heroes” e símbolos franquistas, e tendo en conta que deberá ser a comisión a que estude caso a caso todos as rúas e símbolos que podan estar afectados pola Lei, entendemos que a priori non se pode establecer unha comparación minimamente razoábel entre un dos actores principais dun golpe de estado ilegal e dunha brutal represión que deixou milleiros de mortes no noso país e un alcalde dun pequeno concello da Mariña no tardo-franquismo.

Agardamos que ficase clara a postura do noso colectivo e esperamos que a comisión sobre a presenza de simboloxía franquista en Burela sexa unha realidade que xere un espazo de debate serio e sempre desde o respecto ás persoas que nela se integren. Tamén esperamos que participen todos os partidos políticos e axentes sociais convocados. Nós, alí vamos estar.

Colectivo Cultural Buril

Eijo Garay: a outra cara da moeda

2009-09-02T00:09:00.005+01:00

No texo que segue apresentam-se algumhas achegas sobre Eijo Garay, elaborado pola Comissom de História do Buril, sendo publicado na ediçom da Marinha de El Progreso (pág. 5) e noutros méios como Crónica3:

Desde o pasado 9 de Xullo, día no que o Buril facía pública a súa proposta para que se retirase o nome de Eijo Garay a unha das principais rúas da nosa vila, moito se ten falado sobre esta controvertida personaxe.

Primeiramente, desde o Colectivo Cultural Buril queremos agradecer o respecto e a cordialidade con que foi acollida esta proposta polas tres forzas políticas. Tamén queremos amosar a nosa perplexidade polo posicionamento público do que entendemos debería ser o cronista oficial de todos os burelaos e burelás, cualificando de “inxenua ocorrencia” o que foi en todo o momento unha proposta seria e responsábel, plantexada desde a rigorosa análise das fontes consultadas e tendo en conta a lexislación actualmente vixente.

Falando xa sobre o que é a figura do señor Eijo Garay, sorpréndenos como se valora por parte dalgún colectivo o tráfico de influencias do cal se valeu o bispo para “regalar” aos mariñeiros de Burela un porto de abrigo. Desde a Comissom de História do Buril, interpretamos que esta mediación non é suficiente como para agradecerlle ao relixioso a prosperidade con que avanzou o noso porto posteriormente, e cremos que o traballo diario que de xeito anónimo realizaron e realizan redeiras, peixeiras, mariñeiros… ten máis que ver co desenvolvemento do peirao que as xestións de Eijo Garay. Defender o contrario sería tanto como dedicarlle o acceso ao porto burelao aos políticos que intermediaron para a súa realización ou pórlle á Casa da Cultura o nome do político que promoveu a súa construción.

Tendo en conta todo o até agora dito, asumimos que sería discutíbel o recoñecemento social a Eijo Garay, porén, non podemos ficar nunha análise parcial da súa vida, pois obviar a súa traxectoria político-social sería faltar ao rigor histórico.

A Comissom de História do Buril non pode pasar por alto o destacado papel deste individuo xa desde os primeiros anos da II República Española, como aguillada do sistema educativo republicano, referente pedagóxico aínda nos nosos días e que Eijo Garay combateu desde a asociación “Cruzados de la Enseñanaza”.

Após o triunfo golpista do 36, o bispo ten deixado mostras evidentes dunha fiel adhesión ao réxime, tal como fica demostrado na súa presenza o 15 de Agosto de 1936 no izado da bandeira nacional fascista en Vigo, no paso de revista ás tropas que días antes tiñan asasinado a centenares de defensores da legalidade republicana vixente.

Posteriormente son moitas as manifestacións públicas nas que o prelado ten demostrado a súa fervente adhesión ao réxime franquista. O 25 de Novembro de 1936 declaraba: “Tengo fe ciega en el acierto del Generalísimo Franco, hombre deparado por Dios para la salvación de España, como vengo diciendo desde hace años”.

Xa estabilizado o Réxime e rematada a II Guerra Mundial, é destacábel o papel principal que Eijo Garay xogou ao facilitar a saída de criminais de guerra nazis cara a Sudamérica, tal como fica demostrado coa desclasificación dos arquivos do Ministerio de Asuntos Exteriores español.

Agardamos que con esta sintética achega biográfica, fiquen claros os parámetros nos que se moveu o C.C. Buril para solicitar a retirada do nome de Eijo Garay do noso rueiro.

Comissom de História do C.C. Buril

POR HIGIENE DEMOCRÁTICA: ELIMINAÇOM DA SIMBOLOGIA FASCISTA DA NOSSA VILA!

2009-07-07T15:07:00.001+01:00

Desde o Colectivo Cultural Buril, entendemos que no actual contexto de crise estrutural que padecemos se obviam questons que nom por menos importantes se deveriam passar por alto. Queremos manifestar o nosso mal-estar pola pervivença de nomes nom dignos no nosso rueiro. Consideramos que ter de passar pola Rua Eijo Garay no século XXI remete-nos para épocas de repressom que se dizem passadas, sendo ainda maior a nossa preocupaçom se temos em conta que nem sequer se respeita a legislaçom em vigor, a denominada Lei de Memória Histórica que obrigaria a eliminar o nome de Eijo Garay do nosso rueiro.

Nom podemos aceitar que a dia de hoje, umha das principais ruas da nossa vila, esteja dedicada a umha figura fundamental na configuraçom do golpe de estado do 36 e na posterior repressom franquista.

Nom seremos @s primeir@s a reclamar umha reparaçom moral à exaltaçom de figuras e símbolos fascistas nos espaços urbanos que habitamos, pois infelizmente, estes factos dam-se em muitos outros pontos do nosso país, havendo, no que diz a respeito de Eijo Garay, antecedentes que legitimam as nossas justas reivindicaçons. É este o caso do viguês ‘Colexio de Educación Infantil e Primaria Doutor Eijo Garay’, actualmente chamado ‘Colexio de Educación Infantil e Pimaria Illas Cíes’, por Ordem do 8 de Abril da Conselharia de Educaçom e de Ordenaçom Universitária.

As burelás e os burelaos, nom podemos ser cúmplices durante mais tempo desta injustiça histórica, cuja reparaçom já chega com demora. É por isso que solicitamos a retirada imediata do nome de Eijo Garay do nosso rueiro, por justiça histórica e higiene democrática, porque queremos viver num espaço livre de nomes e símbolos que representam a época mais escura na história recente do nosso país.

A nossa alternativa:

Se bem desde o C.C. Buril consideramos que existe umha carência real de referentes do galeguismo popular nos nomes das nossas ruas, entendemos que temos em Burela persoeiros com um perfil o suficientemente digno como para estar presentes no nosso rueiro.

É este o caso de Ricardo Pena Domínguez, primeiro Cronista Oficial da nossa vila e autor do livro Burela. Apontamentos Históricos e Crónica do Século XX, um dos manuais referenciais da nossa história local. Seria inútil enumerarmos aqui todos os motivos polos quais dedicar-lhe umha rua, mas consideramos que o elevado grau de familiaridade que atingiu na vila de Burela, é motivo suficiente para ser merecente do reconhecimento popular.

Para todo isto, o C.C. Buril reuniremo-nos primeiramente com as três forças políticas com representaçom na Câmara Municipal burelá para conseguir o seu respaldo à nossa reclamaçom e que esta medida atinja o apoio de tod@s os concelheir@s no próximo pleno local.

Leopoldo Eijo y Garay. Quem foi e que fijo?

2009-07-07T15:02:00.002+01:00

Eijo Garay foi Bispo de Tui (1914-1917), Bispo de Vitoria (1917-1922) e Bispo de Madrid-Alcalá. (1923-1963). O 21 de Julho de 1946 é nomeado Patriarca das Índias Ocidentais polo papa Pío XII, título simbólico, mas que dava prestígio ao bispo da capital de Espanha em pleno auge de um regímen interessado em renovar a ideia do Império Espanhol. Eijo y Garay foi, de facto, um dos prelados mais fiéis ao regímen, apoiando abertamente o golpe de estado fascista em inúmeras ocasions, fazendo a sua primeira apariçom pública o 15 de Agosto de 1936, quando assiste em Vigo ao içado da bandeira nacional fascista, acompanhando ao comandante militar golpista Felipe Sánchez no passo de revista às tropas.

Nos anos da República fora umha das principais figuras na oposiçom ao poder legalmente constituído, desenvolvendo um intenso trabalho desde distintos frentes, bem desde o activismo religioso, com a organizaçom do associativismo sindical católico ou o impulsionamento das escolas primárias católicas (criou a associaçom Cruzados de la Enseñanza), bem como polo seu posicionamento político-ideológico, ingressando, em 1935 na Academia de las Ciencias Morales y Políticas, desde onde combateu duramente a República.

Morre o 31 de Agosto de 1963. Desde entom, e tendo sido já celebrado o Concilio Vaticano II, o patriarcado das Índias Ocidentais permaneceu bacante até hoje, ainda que nunca fosse formalmente suprimido.

Linhas chave na sua trajectória político-ideológica:

· Apoiou a tentativa de expansom colonial espanhola no Magreb durante o regime afonsino, expansom que ocasionou desastres como o de Annual ou Barranco do Lobo.

· Durante o Governo da República, adere aos Monárquicos, posicionando-se em contra de sectores da igreja que reconheciam a legitimidade da República.

· Apoia e promove o golpe de estado fascista contra o Governo Republicano legitimamente constituído.

Frases ‘célebres’:

· 15 de Agosto de 1936. No içado da bandeira nacional fascista em Vigo, pronuncia estas palavras: “Esta bandera gloriosa que jamás debió ser arriada del corazón de la nacionalidad la izamos ahora nuevamente, pero para no arriarla jamás, porque no habrá un solo español que deje de impedirlo con todas sus energías y con toda la sangre llevada a toda clase de sacrificios. Son los colores de esta gloriosa bandara el rojo de la sangre de nuestros padres, y el amarillo de los valores de España. Juremos todos, pues, defender la santa Patria y la santa bandera”. (180)

· Novembro de 1936. “Tengo vivísimos deseos de visitar al General Franco; pero estoy a muchos kilómetros, y tampoco está él ahora para recibir visitas. Él sabe bien lo mucho que lo quiero y admiro, y que siempre creí que él sería el salvador de España”. (187)

· 25 de Novembro de 1936. “Tengo fe ciega en el acierto del Generalísimo Franco, hombre deparado por Dios para la salvación de España, como vengo diciendo desde hace años”. (188)

· Janeiro de 1937. Na carta que leva por título La hora presente afirma: “esta España nuestras […] ha sido y sigue siendo el pueblo católico por excelencia; y de ello es buena prueba el heroico esfuerzo con que lucha hoy por su fe”. Continua: “La rebelión era para España un derecho, si quería salvarse y salvar su patrimonio histórico, su honor y su vida civilizada. Derecho que constituía un deber. […] Pues bien, en España el comunismo no podía ya ser vencido, despues de su ilegal asalto al poder, si no es con la razón de las armas, puesto que había reducido fieramente a silencio forzoso las armas de la razón, y había secuestrado los derechos de la más elemental libertad. Usurpado el poder, y el ejercicio con cruel y sangrienta tiranía, cegaba el marxismo todas la vías legales; sólo un pueblo de esclavos podía renunciar a las vías justas y legítimas para derrocar al tirano. Cuando la sustancia de la legalidad es la injusticia, no le queda a la conciencia y a la acción más recurso que buscar la justicia en la legítima ilegalidad. Tanto los individuos como la sociedad tienen derecho a su legítima defensa, que es sagrada porque es ley de naturaleza”. (190-191).

· 20 de Maio de 1939. Arrodillado, el dictador Francisco Franco oró unos instantes. El Obispo de Madrid, Leopoldo Eijo y Garay, le había dicho en la iglesia de las Salesas: “Nunca he incensado con tanta satisfacción como ahora lo hago con Vuestra Excelencia”. Era el 20 de mayo de 1939, apenas un mes y medio después del fin de la Guerra Civil, y el Caudillo, triunfante, entregaba al Primado de España, el cardenal Isidro Gomá, su espada como símbolo de la “victoria” sobre la República.

Carvalho Calero 2010

2009-05-26T14:13:00.003+01:00

Dentro das actividades agendadas para o Dia das Letras, realizamos um mural no que reivindicamos o reconhecimento nacional por parte das instituiçons linguísticas da Galiza ao pai do reintegracionismo moderno, Ricardo Carvalho Calero, dedicando-lhe o Dia das Letras Galegas o próximo ano 2010, ano do centenário do seu nascimento.

Desde o Buril, queremos somar-nos assim à campanha nacional "Por um Dia das Letras para Carvalho Calero" e às distintas iniciativas sociais que estam a trabalhar na dignificaçom da nossa língua por todo o País.

No 2010, Letras Galegas a Carvalho Calero!

2009-05-12T17:22:00.004+01:00

O próximo 17 de maio, Dia das Letras Galegas, o Colectivo Cultural Buril quer somar-se mais uma ano, à defesa e dignificaçom da nossa língua. Por isso, aderimos à manifestaçom convocada pola plataforma Galego Sempre Mais, que terá lugar o próximo domingo em Compostela, com saída às 12:00 horas do kiosko da mús¡ca da Alameda.

Queremos encorajar às burelás e burelaos e que acudam a esta manifestaçom convocada polos colectivos e centros sociais de base de todo o país.

A seguir, reproduzimos o manifesto:

O dia 17 de maio é um dia para denunciar nas ruas a única imposiçom lingüística verificável que este país sofre diariamente. E este ano estamos a viver um contexto novo, um contexto cheio de dúvidas e de poucas esperanças para a sobrevivência da língua na Galiza, daí que todos o colectivos que assinamos este manifesto queiramos expressar conjuntamente o nosso ponto de vista e contribuir para o avanço da normalidade lingüística no nosso País.

O nosso manifesto leva como lema “Galego, sempre mais”, e dizemos isto porque achamos que se por um lado o galego é umha língua cheia de possibilidades e oportunidades, por outro lado, tudo o que se fizer na Galiza em favor dos usos da língua galega nunca será suficiente. Saímos à rua com umha mensagem clara: “Contra a imposiçom do castelhano”.

Os colectivos que assinamos este manifesto temos toda a vontade de somar esforços pola dignificaçom do galego na Galiza. Se este 17 de maio nom há convocatória unitária é porque a mesa pola normalizaçom lingüística optou por prescindir do resto de organizações (fomos convidados a apoiar umha mobilizaçom já convocada previamente). A Mesa nom é a única organizaçom a defender a língua e, portanto, nom pode agir como se o fosse. É por isto que nom apoiamos nominalmente a manifestaçom da Mesa. No entanto, por responsabilidade com o momento histórico que padecemos, somaremo-nos a este 17 de Maio. Faremo-lo mantendo umha distáncia com quem achamos que atende mais as necessidades de umha sigla política que as do movimento normalizador.

Por todo isto este 17 de maio queremos fazer saber que:

É umha falácia que exista umha imposiçom do galego. A imposiçom do castelhano nom tem discussom desde o momento em que é a única língua que todos os cidadãos e cidadãs do estado espanhol têm a obriga de conhecer segundo a constituiçom espanhola.
Reclamamos, para enfrentar esta situaçom, a aboliçom do sistema legal que subordina o galego ao castelhano, a aboliçom do supremacismo castelhano que procura a limpeza do galego e exigimos a implementaçom de autênticas políticas de normalizaçom lingüística ao serviço da nossa sociedade.
Consideramos hipócrita a negaçom do conflito lingüístico existente na sociedade galega, causado por umha legislaçom de inspiraçom perversa, que condiciona e impede o desenvolvimento de umha verdadeira normalizaçom lingüística. Exigimos, aliás, que instituições teoricamente concebidas para o estudo e potenciamento da língua (RAG e ILG) se pronunciem sobre tal conflito, saindo de um silêncio que colabora na subordinaçom do galego e na manutençom do supremacismo castelhano.
Afirmamos que a normalizaçom lingüística é um direito colectivo inalienável, constituindo a necessária coesom social de cada povo em torno à língua própria. O monolingüismo social é o complemento natural ao polilingüismo individual e à diversidade lingüística crescente das sociedades actuais. Negamos a reduçom do galego a um fenómeno meramente individual pois, como qualquer língua viva, é umha realidade social cujo sentido e utilidade reside no seu uso na Galiza como língua comum a todos e todas e para o relacionamento internacional.
Toda a instituiçom social, como os meios de comunicaçom, ensino, administraçom e quaisquer serviços públicos, deve contribuir, portanto, à eliminaçom dos preconceitos e discriminações contra a nossa identidade lingüística e cultural e promover a normalizaçom lingüística. Denunciamos especialmente a pretensom de continuar discriminando o galego no ensino infantil e pré-escolar, encorajando o auto-ódio e a galegofobia.
Consideramos que, frente ao recrudescimento do discurso refractário ao galego na vida pública, a política lingüística nos últimos quatro anos se tem caracterizado polo continuísmo com a era fraguista. E que com a chegada do novo governo à Junta da Galiza se aproximam tempos de retrocesso e de concessom aos sectores mais espanholistas.
A nossa aposta é reintegracionista, pois consideramos que o único futuro do galego passa por integrar-se no mundo da Lusofonia que permitirá a sua sobrevivência, ajudará ao seu prestígio e, sobretudo, fará com que os utentes tenham um universo de possibilidades de relações humanas, comerciais e culturais ao seu dispor.
Fazemos parte do movimento social de base que trabalha diariamente ao longo de muitos anos para a dignificaçom da língua e da cultura galegas e que nom somos um movimento que fique à espera de que governos ou instituições venham a lançar leis que salvem ou embarguem o futuro da língua.
O sistema cultural galego, com todos os seus produtos, é um sistema cultural dependente do sistema cultural espanhol e tem como conseqüência que todos os produtos que chegam a nós tenham que ter passado anteriormente um filtro. A nossa cultura nunca conseguirá falar em pé de igualdade com culturas doutros lugares estando baixo este jugo, pois nom poderá ter presença própria, senom através da espanhola.
Denunciamos a discriminaçom e silenciamento da tradiçom cultural galeguista do reintegracionismo, e reclamamos o justo reconhecimento social de umha das principais figuras culturais do século xx galego, cujo legado continua vivo: Ricardo Carvalho Calero, para quem reclamamos o Dia das Letras no ano 2010, ano em que se cumprem 100 anos do seu nascimento e 20 anos do seu finamento.

Contra a imposiçom do castelhano

Galego sempre mais

Temos umha língua mundial! 09

2009-05-07T23:51:00.012+01:00

Baixo a legenda Temos umha língua mundial! o Buril apresenta as actividades que seguem para comemorar o Dia das Letras deste ano 2009:

Sábado, 9 de maio: Haverá umha Festa pola língua, no pub burelao Penta, a partir das 22:00 horas com petiscos de graça e um concerto da banda de rock burelá Torques, por volta das 00:00 h. A seguir ao concerto haverá sessom com músicas e vídeo clips em galego, em muitas das variantes que a nossa língua tem no mundo.

Sábado, 16 de maio: Realizaçom de um mural para reivindicar um reconhecimento nacional a Carvalho Calero, dedicando-lhe o Dia das Letras Galegas o próximo ano 2010, ano do centenário do seu nascimento e do vigésimo aniversário da sua morte.

Domingo, 17 de maio: o Buril convida a tod@s @s burelaos e burelás a participar na manifestaçom nacional convocada pola plataforma Galego Sempre Mais, em defesa da nossa língua e contra a imposiçom do castelhano.

Temos um plano B

2009-04-29T13:08:00.005+01:00

O documentário Modelo Burela, realizado por Matías Nicieza, será apresentado esta quinta-feira, 30 de abril, na Gentalha do Pichel de Compostela. Intervirám Bernardo Penabade, guionista do documentário e professor no I.E.S. O Perdouro de Burela e a técnica de normalizaçom da Câmara Municipal de Compostela, Marta Besada Otero.

Desde o Buril animamos a tod@s @s vizinhos de Burela e d'A Marinha que fam vida por Compostela a que assistam à projecçom deste interessante documentário e que acheguem as suas opinions sobre a situaçom linguísta na nossa vila.

A Lei do aborto a debate

2009-04-08T16:34:00.000+01:00

A passada sexta-feira, 4 de abril foi debatida a reforma da Lei do aborto. No acto, organizado polo Buril, intervirom a jurista Luísa González, a representante do BNG Tereixa Novo e a representante do PSdG-PSOE Laura Seara. O debate foi moderado pola tradutora, jornalista e investigadora Olga Castro.

Houvo umha importante assistência de público, sem dúvida interessado por um tema de grande actualidade e que afecta directamente aos direitos fundamentais da mulher.